Cest de mon droit que ie vous maine
A la dance gent connestable
Le plus fort: comme charlemaigne
Mort prent: cest chose veritable
Rien ny vault chiere espouentable
Ne forte armeure en cest assault
Dun cop iabas le plus estable
Rien nest darmes quant mort assault
¶Le connestable
Iauoye encor intention
Dassaillir chasteau: forteresse
Et mener a subiection
En acquerant honneur/ richesse
Mais ie voy que toute prouesse
Mort met abas: cest grant despit
Tout lui est vng: doulceur rudesse
Contre la mort na nul respit
¶Le mort
Que vous tirez la teste arriere
Archeuesque tirez vous pres
Auez vous paour quon ne vous fiere
Ne doubtez. vous venrez apres
Nest pas tousiours la mort empres
Tout homme & le suyt coste a coste
Rendre conuient debtes & prestz
Vne fois fault compter a loste
¶Larcheuesque
Las ie ne scay ou regarder
Tant suis par mort a grant destroit
Ou fuiray ie pour moy aider
Certes qui bien la congnoistroit
Hors de raison iamais nistroit
Plus ne gerray en chambre painte
Mourir me conuient cest le droit
Quant faire fault cest grant contrainte
¶Le mort
Vous qui entre les grans barons
Auez eu renom cheualier
Oubliez trompettes. clarons
Et me suiuez sans sommeiller
Les dames soulies reueiller
En faisant dancer longue piece
A autre dance fault veiller
Ce que lung fait lautre depiece