„Herrgott, wenn i nix woaß ...“
„Jetzt woaßt d’ as, weil i dir’s g’sagt hab. Aba wart no, da wer i glei g’holf’n hamm,“ sagte Trinkl und nahm mit einem raschen Griff die Pistolen und steckte eine in die linke und eine in die rechte Tasche.
„Wart! De ko si der Hansdampf jetzt bei mir hol’n.“
„Aba Michl!“
„Wos aba? Nix aba! I bin an Amtsperson, verstand’n? Und bal i a Werkzeug siech, wo ein Verbrech’n damit beganga wer’n soll, dös konfiszier i ganz oafach ...“
„Ja, mir is gleich ...“
„Derf da scho gleich sei ... Derfst d’ sogar froh sei, daß i di von dera Dummheit z’ruckg’halt’n hab. Dös waar dös wahre, wenn a Bürger aa no zu so was helfat!“
„Wenn i dir sag, daß i nix g’wißt hab!“
„Aber unwissend was hättst du eahm de Waff’n g’liefert. Wurdst scho g’schaugt hamm, Manndei, wia s’ di füra zog’n hätt’n!“
„Ja no, du host jetzt de Pistol’n, und mi geht’s nix mehr o, bal du sagst, daß du’s von Amts weg’n gnumma host ...“